بۇگىن تاراز مەملەكەتتىك پەداگوگيكالىق ۋنيۆەرسيتەتىندە «زاماناۋي ءبىلىم: ءادىسناما, تەوريا مەن تاجىريبە» اتتى حالىقارالىق كونفەرەنتسيا ءوتتى.
اتالعان كونفەرەنتسياعا اقش, رەسەي, بەلارۋس, لاتۆيا, انگليا, چەحيا, گەرمانيا جانە وزگە دە مەملەكەتتىڭ عالىمدارى قاتىسىپ, پىكىر الماستى. كونە تاراز تورىندە قولعا الىنعان عىلىمي-پراكتيكالىق كونفەرەنتسيانىڭ جيناعىنا الدىن-الا ماقالا جىبەرگەن قاتىسۋشىلار ىرىكتەلگەن. ولار ءوز جۇمىستارىندا قازىرگى ءبىلىم سالاسىنا ۇلەس قوسۋدىڭ تىڭ جولدارىن قاراستىرا وتىرىپ, بارشانىڭ مۇددەسىن قامتاماسىز ەتەتىن پىكىرلەرىن العا تارتتى. عىلىمي شارانى اتالعان ۋنيۆەرسيتەتتىڭ وقۋ ادىستەمەلىك جۇمىستار جونىندەگى پرورەكتورى ساۋلە الىمباەۆا اشتى.
جاڭا ءداۋىردىڭ وقۋ باعىتىن سارالاعان جيىندا ءبىلىم باعدارلاماسىن قايتا قۇرىپ, تىڭ ادىستەردىڭ ەنۋىن قامتاماسىز ەتۋ, سونداي-اق, زامان تالابىنا ساي پەداگوگ مامانداردى وقىتىپ, تاربيەلەپ شىعارۋدىڭ ماڭىزى العا تارتىلدى.
ال گەرمانيادان كەلگەن PhD دوكتور گوتفريك توماس «ەۋروپاداعى CLIL-ساباقتارىنىڭ تاريحى, مىنەزدەمەسى جانە پروبلەمالارى – تەوريا جانە تاجىريبە تۋرالى كەيبىر نەگىزگى يدەيالار» تاقىرىبىن قوزعادى. بۇدان بولەك سپيكەرلەر قاتارىندا ۆيلداۋ قولدانبالى عىلىمدار ۋنيۆەرسيتەتىنىڭ پروفەسسورى پيتەر ەندەرس, اقش-تاعى ەۆەرگرين مەملەكەتتىك كوللەدجىنىڭ PhD دوكتورى نەنسي كوپپەلمان جانە تاعى دا باسقا ازاماتتار بولدى. سونىمەن قاتار, دوتسەنت ناريما ەسەنوۆا, دوتسەنت اسىلجان كەنجەكەرەي ۇلى, PhD دوكتور راۋشان تاۋباەۆا, PhD دوكتور گۇلنۇر يسابەكوۆا جانە PhD دوكتور پەريزات قۇداباەۆا ءوز ويلارىن ورتاعا سالدى.
حاميت ەسامان,
«ەگەمەن قازاقستان»
جامبىل وبلىسى